एक गाँव म एक गरीब लेड़गा रहय। ये दुनिया म लेड़गा के कोन्हों नइ रिहिस। दाई रिहिस तउनो ह कुछ समे पहिली गुजर गे। लेड़गा ह बनी-भूती करके भाजी-कोदई, चुनी-भूंसी खाके अपन गुजर बसर करत रहय।
सम्पत्ति के नाव म लेड़गा के एक झोपड़ी भर रहय तब उही झोपड़ी के आधा म पैरा के खदर छानी रहय अउ आधा ह अइसने खुल्ला। एक ठन गाय रहय जउन ह आधा भीतरी तब आधा बहिरी बंधाय। एक ठन हउला रहय तहु ह नो जगह ले टोड़का रहय जउन ला लाख म लाख के पानी भरे के पुरतिन बने दे गे रिहिस।
लेड़गा दिन भर दूसर घर मंजूरी करय अउ रतिहा घर आके भात-साग रांधे। अलवा-जलवा खा पी के सुत जावय। अइसने बपरा लेड़गा के एक लांघन एक फरहर करके जिनगी ह बीतत रहय।
पर घर के रोजी-मंजूरी के संशो म न तो ओखर खाय के ठिकाना रहय अउ न पिये के। लेड़गा जब सज्ञान होगे तब गांव के सियान मन ओला किहिस- ‘‘बेटा! तोर पहाड़ अस जिनगी अकेल्ला कइसे बीतही।
संसार के सबो जीव ल अपन जोड़ी-जांवर के जरूरत रहिथे। अब तहु सज्ञान होगे हस। कइसनो करके अपन बिहाव करके अपन जोड़ी ले आन। तुंहर दुनो के मिहनत-मंजूरी म जिनगी ह अराम से चलही।‘‘
लेड़गा ला सियान मन के सलाह ह बने लागिस। ओहा लड़की खोजे बर जाय के सोचे फेर ओखर गरीबी के सेती कोन्हों ओखर संग म नइ जावय, सबो झन विचार करे कि सगा मन लेड़गा के चीज-बस के बारे में पूछही तब काय बताबो।
नइ बता सकबो तब तो हमरे फजिहत होही। अकेल्ला जाय बर लेड़गा के हिम्मत घला नइ पुरय। एक दिन लूड़गा के मालिक ल ओखर मन के बात पता चलिस तब ओहा किहिस-‘‘ बेटा! मैंहा तोर संग लड़की खोजे बर तो नइ जा सकव फेर तैहा कोन्हों जाहूँ कहिबे तब तोला महीना भर के छुट्टी अउ तोर खरचा-खुराक बर रूपया-पइसा जरूर दे देहुं।‘‘
अतका ल सुनके लेड़गा के आँखी म आँसू डबडबागे ओहा अपन मालिक के पांव म गिरगे। मालिक बड़ा दयालू चोला रहय ओहा लेड़गा ल उठा के अपन हिरदे म लगा के किहिस-‘‘मैंहा तोर बर उज्जर कपड़ा लत्ता, घोड़ा-गाड़ी सब के वेवस्था कर देहुं तैहा फिकर झन कर। तोर संग म कोन्हों नइ रेंगन कहिथे तब तै अकेल्ला रेंग। जउन अपन सहायता करथे भगवान घला ओखर सहायता करथे , समझगेस?‘‘
मालिक के दे बने उज्जर कपड़ा-ओन्हा ल पहिर के अउ महीना दिन बर राशन-पानी लेके लेड़गा ह बने सुघ्घर असन घोड़ा-गाड़ी म सवार हो के अपन बर लड़की खोजे बर अकेल्ला निकलगे।
घोड़ा-गाड़ी के मजा लेवत लेड़गा ह येती-ओती घूमत-घामत एक अनचिन्हार राज म पहुँचगे। उहां के राज करमचारी मन ओला कोन्हों दुश्मन राजा के भेदिया समझ के पकड़ लिन अउ राजदरबार में पेश कर दिन।
लेड़गा के उज्जर कपड़ा-लत्ता अउ घोड़ा-गाड़ी देख के राजा ह जब पुछिस तब लेड़गा ह जीव के डर म अपन आप ल कोन्हों राज के राजकुमार बता दिस।
राजा के घला एक झन सज्ञान बेटी रहय। उहू ह अपन बेटी बर बने योग्य वर देखत रहय। ओहा बेटी के बिहाव के आशा म लेड़गा ल पूछ पारिस-‘‘आप मन के घर कइसना हे?‘‘
लेड़गा किहिस-‘‘अरे! मोर घर तो अइसे हे राजा साहब कि घर भीतरी सुतबे तबले अगास केचंदा-चँदैनी मन दिखथें।‘‘
‘‘आप मन घर के बरतन-वरतन कतेक हे?‘‘ राजा के बात पूरा होय के पहिली लेड़गा किहिस-‘‘मोर घर तो नव लखा बरतन हे।‘‘ राजा फेर पुछिस- ‘‘अउ गऊ-लक्ष्मी के काय हाल-चाल हे?‘‘ लेड़गा किहिस- ‘‘अरे! ओला झन पुछव राजा साहब मोर घर के गऊ-लक्ष्मी तो आधा घर म बंधाथे अउ आधा बाहिर म।‘‘
राजा मन मन सिरतोन म लेड़गा ल कोन्हों राज के राजकुमार समझ के अपन बेटी के बिहाव के बात चलाथे। लेड़गा ह तुरते राजी हो जथे। बाते-बात म राजा ह अपन बेटी ल लेड़गा बर हार गे अउ चट मंगनी अउ पट बिहाव कर दिस। कुछ दिन लेड़गा ह उही अपन ससुरार म रहिगे।
फेर राजा ह जब अपन बेटी ल बिहाव के बाद ओखर ससुरार म पहुँचाय बर लेड़गा के गांव म पहुँचिस तब लेड़गा के घर-दुवार ला देख के मुड़ धरके बइठगे।
कहे जाथे उही समय ले नोनी-बाबू के बर-बिहाव के पहिली घर-दुवार देखे-जाने के चलन ह शुरू होय हे ।
मोर कहिनी पुरगे। दार भात चुरगे।
- धरम-नियाव छत्तीसगढ़ी लोक कथा । Folk Tale Of Chhattisharh
- बकरी और बाघिन छत्तीसगढ़ी लोक कथा । Folk Tale Of Chhattisharh In Hindi
- 75+ Best Short Moral Stories In Hindi For Kids 2023
- 10 Best Panchatantra Stories In Hindi । पंचतंत्र हिंदी कहानियां
निष्कर्ष । Conclusion
आशा करते है कि आपको हमारी यह पोस्ट लेड़गा के बिहाव छत्तीसगढ़ी लोक कथा । Chhattisgarhi Folk Tales in Hindi जरूर पसंद आयी होगी और आपके सभी सवालों का भी जवाब मिल गया होगा। अगर आपको हमारी इस पोस्ट से सम्बंधित कोई भी सवाल है तो आप हमे कमेंट करके जरूर बताये और जानकारी पसंद आई हो तो इसे अपने दोस्तों और परिवार संग के साथ संग शेयर जरूर करें।