एक गाँव म दू भाई रहंय। बड़े ह पक्का देंहचोर (आलसी), बेईमान अउ एक नंबर के धोखेबाज रहय। कभू खेत नइ जाय, छोटे के कमाई म फुटानी मारय, फुदरय अउ गली-गली मेंछराय। छोटे ह रात-दिन जांगर-टोर कमाय।
खेत म गहूँ के बिरता ह सोना कस पिंवराय रहय। कनिहा भर-भर के पेड़ म खुम-खुम ले बाली भराय रहय। देख के बड़े के नियत ह डोल गे।
बड़ मयारुक भाई कस छोटे ल पुचकार के, दुलार के कहिथे – ”भाई! मंय ह कतका दिन ले तोर कमाई ल खा-खा के मजा उड़ाहूँ? बँटवारा हो जातेन, अपन ऊपर आतिस त महूँ ह कमाय बर सीख जातेंव।”
गरुवा ताय छोटे ह, बड़े भाई के थाप म आ गे।
बड़े ह बाँटे के शुरू करिस। किहिस – ”भाई! तंय आवस सबर दिन के कमइया, सबो खेत ल तंय रख ले; बिरता-बिरवाँ मन ह मोर होही। टेंड़ा अउ कुआँ ह तोर ए, पानी ह मोर ए। खेत रखवार ये कुकुर के एक ठन घउवाहा गोड़ ह तोर ए, तीनों बने गोड़ मन मोर ए।”
छोटे ह भल ला भल जानिस, बड़े के बात ल कभू नइ काँटय, राजी हो गे।
रात म छोटे ह कुकुर संग खेत राखे बर गे रहय। भुर्री बार के तापत रहंय। छोटे ह कुकुर के घउवहा गोड़ म दवा लगा के फरिया म बांध दे रहय, विही फरिया म आगी धर लिस। कुकुर ह कुईं-कुईं करत गहूँ के खेत म खुसर गे। रनाय गहूँ, भुर-भुर ले बर गे।
बिहाने बड़े ह बइसका सकेल डरिस। पंच मन ल भाई बँटवारा के सबो बात ल अउ गहूँ खेत के घटना ल बता के अर्जी-बिनती करिस, किहिस – ”ददा हो! मोर छोटे भाई ल मंय ह बने कहत रेहेंव, फेर वो ह पक्का बेइमान निकलिस। मोर गहूँ के होरा भूँज दिस। मोर नियाव ल कर देव।”
पंच मन छोटे के बात ल घला सुनिन। बड़े के चालबाजी ल समझ गिन। मुखिया ह फैसला सुनाइस – ”भई हो! ककरो खेत के बोंता-बिरता म आगी लग जाना किसान के मुड़ी म बजरा गिरे बरोबर होथे। फेर एमा छोटे के कोनो गलती नइ दिखय। कुकुर ह जउन गोड़ मन म रेंग के खेत म खुसरिस, वो गोड़ मन तो बड़े के आवंय। गलती उँखरे मन के आवय।”
फैसला सुन के बड़े के आँखी ह उघर गे। अब छोटे भाई संग वहू ह मेहनत करे लगिस।
- बकरी और बाघिन छत्तीसगढ़ी लोक कथा । Folk Tale Of Chhattisharh In Hindi
- 75+ Best Short Moral Stories In Hindi For Kids 2023
- 10 Best Panchatantra Stories In Hindi । पंचतंत्र हिंदी कहानियां
- Kids Poem In Hindi । बच्चों की बाल कविताएं
निष्कर्ष । Conclusion
आशा करते है कि आपको हमारी यह पोस्ट धरम-नियाव छत्तीसगढ़ी लोक कथा । Folk Tale Of Chhattisharh जरूर पसंद आयी होगी और आपके सभी सवालों का भी जवाब मिल गया होगा। अगर आपको हमारी इस पोस्ट से सम्बंधित कोई भी सवाल है तो आप हमे कमेंट करके जरूर बताये और जानकारी पसंद आई हो तो इसे अपने दोस्तों और परिवार संग के साथ संग शेयर जरूर करें।